काठमाडौँ । पशु स्वास्थ्य, खाद्य सुरक्षा तथा “एक स्वास्थ्य” जस्तो मान्छे र जनावरको स्वास्थ्यमा प्रभाव पार्ने कार्यक्रम केन्द्रित, राष्ट्रिय स्तरको भेटेरिनरी सम्मेलन यही चैत अन्तिम साता रुपन्देहीमा आयोजना हुने भएको छ। नेपाल भेटेरिनरी एसोसियसनले १६औँ राष्ट्रिय भेटेरिनरी सम्मेलन ‘भेटकन २०२६’ चैत २७ र २८ गते रुपन्देहीको मणिग्रामस्थित होटल ड्रिमल्याण्ड रिसोर्टमा सञ्चालन गर्ने जनाएको हो।
आयोजकले सम्मेलनलाई केवल पशु उपचार वा प्राविधिक सेवासँग मात्र जोडिएको कार्यक्रमका रूपमा नभई खाद्य प्रणाली, रोग नियन्त्रण, जैविक सुरक्षा र वातावरणीय सन्तुलनसँग सम्बन्धित व्यापक बहसको थलोका रूपमा अघि सारेको छ। यसले भेटेरिनरी क्षेत्रलाई समग्र विकास र सार्वजनिक हितसँग जोडेर हेर्ने प्रयासलाई बल पुर्याउने अपेक्षा गरिएको छ।
एसोसियसनका अनुसार यस वर्षको सम्मेलन “दिगो पशुपालन र खाद्य सुरक्षाका लागि एक स्वास्थ्य मार्ग” भन्ने मूल नारासहित हुन लागेको हो। सम्मेलनमार्फत मानव स्वास्थ्य, पशु स्वास्थ्य र वातावरणबीचको अन्तरसम्बन्धलाई अझ स्पष्ट रूपमा उठान गर्ने तथा वैज्ञानिक छलफलका माध्यमबाट साझा समझ विस्तार गर्ने लक्ष्य लिइएको छ।
सम्मेलनमा नेपालका साथै विभिन्न देशका विज्ञ, अनुसन्धानकर्ता, प्राध्यापक, विद्यार्थी तथा पशुपन्छी क्षेत्रसँग प्रत्यक्ष सरोकार राख्ने ५०० जना भन्दा बढी प्रतिनिधिको सहभागिता रहने बताइएको छ। आयोजकका अनुसार १५० भन्दा बढी अनुसन्धानपत्र प्रस्तुत हुने अनुमान छ भने १० भन्दा बढी देशबाट प्रतिनिधि सहभागी हुन सक्नेछन्। त्यस्तै १५ भन्दा बढी अन्तर्राष्ट्रिय वक्ताले रोग नियन्त्रण, पशु स्वास्थ्य, खाद्य सुरक्षा, जलवायु परिवर्तन र पशुधन क्षेत्रमा त्यसको असरजस्ता विषयमा प्रस्तुति दिने कार्यक्रम तय गरिएको छ।
दुईदिने सम्मेलनमा प्राविधिक छलफल, अनुसन्धान प्रस्तुति, विषयगत प्यानल र अनुभव आदानप्रदानका सत्र सञ्चालन गरिनेछन्। यस्ता कार्यक्रमले भेटेरिनरी व्यवसायी, अनुसन्धान संस्था, शैक्षिक समुदाय र नीतिनिर्माण तहबीच सहकार्य बढाउन सहयोग पुग्ने विश्वास गरिएको छ। साथै नयाँ प्रविधि, व्यवहारिक अभ्यास र अनुसन्धानका निष्कर्षबारे साझा बहस हुने भएकाले सम्मेलनलाई ज्ञान आदानप्रदानको उपयोगी अवसरका रूपमा हेरिएको छ।
विद्यार्थीलाई लक्षित गर्दै यसपटक पोस्टर प्रतियोगितासमेत समावेश गरिएको छ। उत्कृष्ट प्रस्तुतिका लागि पुरस्कार र प्रमाणपत्र प्रदान गरिने आयोजकले जनाएको छ। यसले अध्ययनरत विद्यार्थीमा अनुसन्धानप्रतिको रुचि बढाउनुका साथै प्रस्तुति क्षमतामा समेत टेवा पुग्ने अपेक्षा गरिएको छ।
सम्मेलनका अवसरमा लामो समयदेखि पशु स्वास्थ्य क्षेत्रमा सक्रिय चिकित्सकहरूलाई विशेष सम्मान गर्ने कार्यक्रम पनि राखिएको छ। नेपाल भेटेरिनरी एसोसियसनका महासचिव डा. शंकर न्यौपानेका अनुसार २५ वर्षभन्दा बढी समयदेखि क्षेत्रमा योगदान पुर्याएका अनुभवी पशु चिकित्सकलाई सम्मान गरिनेछ। यससँगै अन्य राष्ट्रिय सम्मान तथा पुरस्कारसमेत प्रदान गरिने तयारी छ।
त्यसैगरी,नेपाल भेटेरिनरी एसोसियसनका अध्यक्ष डा. केदार सुबेदीले एग्रि भेट सञ्चारसँग कुरा गर्दै ‘भेटकन २०२६’ ले पशु स्वास्थ्य, अनुसन्धान र नवीन प्रविधिको क्षेत्रमा महत्वपूर्ण योगदान पुर्याउने बताए। उनले “एक स्वास्थ्य” अवधारणालाई व्यवहारमा उतार्दै यस सम्मेलनले पशुपालन, खाद्य सुरक्षा र अन्तरसंस्थागत सहकार्यलाई नयाँ उचाइमा पुर्याउने विश्वास व्यक्त गरे। साथै, यो सम्मेलन ज्ञान, अनुभव र नवप्रवर्तनको साझा मञ्चका रूपमा स्थापित भई पशु स्वास्थ्य क्षेत्रको दिगो विकासका साथै समग्र समाजको समृद्धि र सुरक्षित भविष्य निर्माणमा समेत प्रेरक भूमिका खेल्ने उनले बताए।
कार्यक्रमस्थलमा पशुपन्छी क्षेत्रसँग सम्बन्धित विभिन्न प्रदर्शनी स्टल पनि रहनेछन्। ती स्टलमार्फत औषधि, खोप, पोषण, आहार, पशु स्वास्थ्य सेवा तथा आधुनिक प्रविधिसम्बन्धी सामग्री प्रदर्शन गरिने जनाइएको छ। सहभागीले नयाँ अभ्यास, प्रविधि र अनुसन्धान उपलब्धिबारे प्रत्यक्ष जानकारी प्राप्त गर्ने अवसर पाउने आयोजकको भनाइ छ।
सम्मेलनलाई नेपाल सरकारका सम्बन्धित निकायसँगै खाद्य तथा कृषि संगठन (एफएओ), अमेरिकी सोयाबिन निर्यात परिषद्, नेपाल भेटेरिनरी काउन्सिल लगायत विभिन्न पेशागत र व्यावसायिक संस्थाको सहयोग रहने बताइएको छ। आयोजकले यस्तो सहकार्यले सम्मेलनलाई केवल औपचारिक जमघटमा सीमित नराखी नीतिगत समन्वय र संस्थागत सहकार्यको प्रभावकारी मञ्चका रूपमा स्थापित गर्न मद्दत पुग्ने विश्वास व्यक्त गरेको छ।
