चितवन — राष्ट्रिय प्रकृति संरक्षण कोषले ‘मानव–वन्यजन्तु सहअस्तित्वका लागि प्रभावकारी रिपोर्टिङ’ शीर्षकमा दुई दिने प्रशिक्षण सफलतापूर्वक सम्पन्न गरेको छ। प्रशिक्षणको मुख्य उद्देश्य सञ्चार माध्यम र संरक्षण कार्यबीचको दूरी घटाउँदै जनचेतना र दिगो सहअस्तित्व प्रवर्द्धन गर्नु रहेको थियो।
प्रशिक्षणमा काठमाडौं र चितवनका पत्रकारहरूले मानव–वन्यजन्तु सम्बन्धका जटिल पक्षहरू प्रत्यक्ष अनुभव गर्न पाएका थिए। प्रशिक्षणमा पर्यावरण पत्रकार/लेखक रमेश भुषाल ले वन्यजन्तु रिपोर्टिङमा आफ्नो विशेषज्ञता सबैसँग सेयर गरे भने पत्रकार रमेश कुमार पौडेल ले चितवन क्षेत्रमा सहअस्तित्वका चुनौतीपूर्ण विषयलाई कसरी रिपोर्ट गर्ने भन्ने विषयमा ध्यान केन्द्रित गरे।
प्रशिक्षणलाई थप सशक्त बनाउँदै वृक्ष तथा वनाधिकारी विष्णु आचार्य ले सञ्चार माध्यममा वन सम्बन्धी कवरेजको महत्वबारे प्रकाश पार्नुभयो। NTNC का संरक्षण अधिकृत गोविन्द प्रसाद पोखरेल ले विवादमुखी समाचारभन्दा समाधानमुखी रिपोर्टिङमा जोड दिनु आवश्यक रहेको औंल्याउनुभयो। स्थानीय सन्दर्भ थप्दै, NTNC – जैविक विविधता संरक्षण केन्द्रका ऋषि सुवेदी ले मादी क्षेत्रका संरक्षण गतिविधिहरूको विस्तृत अवलोकन प्रस्तुत गर्नुभयो।
चितवनका वरिष्ठ पत्रकारहरूले पनि आफ्ना दृष्टिकोण साझा गर्दै वन्यजन्तु विषयको रिपोर्टिङमा सञ्चार माध्यमले जनधारणालाई आकार दिनुपर्ने जिम्मेवारीबारे जोड दिनुभयो।
प्रशिक्षण ‘लार्ज कार्निभोरसँग सहअस्तित्व’ परियोजनाबारे प्रमुख गतिविधिको रूपमा सफलतापूर्वक सञ्चालन गरिएको थियो। यसमा Darwin Initiative र Chester Zoo को सहयोग रहेको थियो। NTNC का अनुसार, यस प्रकारका प्रशिक्षणले पत्रकारहरूलाई मानव–वन्यजन्तु सहअस्तित्वका सन्दर्भमा समाधानमुखी र जिम्मेवार रिपोर्टिङ गर्न सक्षम बनाउने बुझाइ रहेको जनाएको छ।
