कीर्तिपुरस्थित त्रिभुवन विश्वविद्यालय परिसरमा मृत अवस्थामा भेटिएका ठूलो सङ्ख्याका कागमा बर्डफ्लु संक्रमण पुष्टि भएको छ। कीर्तिपुर नगरपालिका र पशु स्वास्थ्य विभाग को संयुक्त टोलीले मंगलबार ६८ वटा काग संकलन गरी व्यवस्थापन गरेको हो।
नगरपालिकाकी पशुसेवा प्रमुख सुशीला गैरेका अनुसार सबै काग एकैदिन संकलन गर्न नसकिएकाले बाँकी संकलन कार्य बुधबार पनि जारी रहनेछ। उनले जानकारी दिइन् कि एक साताअघि स्थानीयले वीरेन्द्र राज्याभिषेक उद्यान क्षेत्रमा कागहरू मरेको खबर दिएका थिए।
त्यसपछि १० वटा कागको नमूना परीक्षणका लागि पठाइएको थियो। प्रयोगशालाको परीक्षणपछि ती कागमा बर्डफ्लु पुष्टि भएको हो। सोही आधारमा मंगलबारदेखि मृत काग संकलन सुरु गरिएको र संकलन गरिएका ६४ वटा काग खाल्डो खनी गाडिएको जनाइएको छ।
गैरेका अनुसार उक्त क्षेत्रमा अन्य चरा मरेको भने फेला परेको छैन। तर कागजस्ता खुला रूपमा उड्ने पंक्षीमा संक्रमण नियन्त्रण गर्न कठिन हुने भएकाले सतर्कता आवश्यक रहेको उनले बताइन्। यसैबीच कीर्तिपुर क्षेत्रमा कुखुराको दाना ओसारपसार नगर्न सार्वजनिक सूचना जारी गरिएको छ।
यस विषयमा वरिष्ठ पशु चिकित्सक मुकुल उपाध्याय ले मृत कागमा एचफाइभ एनवान र एच नाइन दुवै प्रकारका भाइरस फेला परेको बताए। उनका अनुसार फिरन्ते वा जंगली चराबाट कागमा संक्रमण सरेको हुनसक्ने अनुमान गरिएको छ।
यसअघि पनि राजधानीको बेलायती दूतावास परिसरमा यस्तै संक्रमण देखिएको उल्लेख गर्दै उनले यस्तो समस्या समय–समयमा दोहोरिन सक्ने बताए। साथै यसले अन्य चरामा संक्रमण फैलाउने जोखिम पनि उच्च रहेको उनको भनाइ छ।
विज्ञहरूले कुखुरा, बटाई तथा कालिजपालक किसानलाई खोर सुरक्षित राख्न, जंगली चरा तथा जनावरको पहुँच रोक्न र खुला रूपमा पालन नगर्न सुझाव दिएका छन्। साथै कागलाई अनावश्यक रूपमा मार्ने काम नगर्न र स्रोत नखुलेको सस्तो मासु उपभोग नगर्न पनि आग्रह गरिएको छ।
