चितवनबाट कोलोराडोसम्म: छाडा कुकुरले बदलिदियो आमाछोरीको जीवन
चितवन । केही महिनाअघि भरतपुरस्थित होटेल ग्लोबल परिसरमा बसेका एक अमेरिकी आमाछोरीको जीवनमा एउटा अनपेक्षित क्षण आयो। होटल वरपर घुमिरहेको एक छाडा कुकुर उनीहरू नजिक आइपुग्दा, सुरक्षा गार्ड पाहुनाको सुरक्षाका लागि हतारिँदै कुकुरलाई लखेट्न थाले। कुकुरलाई चोट लाग्ने गरी भगाइएको दृश्य देख्दा ती आमाछोरीको मन पग्लियो, आँखाबाट आँसु झर्यो। कुकुरलाई नभगाउन आग्रह गर्दै उनीहरूले सुरक्षा गार्डलाई फेरि खोजेर ल्याउन अनुरोध गरे। कुकुर फेला परेपछि आमाछोरीले उसलाई सुमसुम्याए, माया गरे—र यही मायाले उनीहरूलाई एउटा ठूलो निर्णयतर्फ डोर्यो।
उनीहरूले सोही कुकुरलाई आफ्नो देश अमेरिका लैजाने निधो गरे। ती पाहुनालाई व्यवस्थापनमा सहयोग गरिरहेका विनोद ढकालका अनुसार अमेरिकी नागरिक ५० वर्षीया चन्दा रेनेग्रेगर र उनकी १६ वर्षीया छोरी म्याडिसनले सबै कानुनी प्रक्रिया पूरा गरेर कुकुरलाई अमेरिका लगेका हुन्। “कुकुर पिटिँदा रोएका आमाछोरीले अमेरिका लैजान्छौँ भनेपछि आवश्यक सबै प्रक्रिया मिलाएर पठाइएको हो,” ढकालले भने, “गत आइतबार कुकुर अमेरिका पुगेको खबरले निकै खुसी बनायो।” गत जुन महिनामा नेपाल आएका उनीहरू दुई साता सोही होटेलमा बसेका थिए।
पूर्वनिर्धारित कार्यसूचीका कारण उनीहरू फर्किएपछि कुकुरको हेरचाह एक स्थानीय व्यक्तिलाई जिम्मा दिइएको थियो। पशु चिकित्सकको सल्लाहमा नियमित स्वास्थ्य परीक्षण गरियो, ‘फिट टु फ्लाइट’ अनुमति र पेट पासपोर्ट बनाएर कतार एयरलाइन्समार्फत कुकुरलाई अमेरिका पठाइयो। हाल उक्त कुकुर अमेरिका राज्य कोलोराडोमा पुगेको छ। सबै प्रक्रिया पूरा गर्न आमाछोरीले १० हजार अमेरिकी डलरभन्दा बढी खर्च गरेको ढकालले जानकारी दिए। “मानिस र जनावरबीचको माया कति गहिरो हुँदो रहेछ भन्ने उनीहरूबाट थाहा पाएँ,” उनले भने, “अमेरिका पुगेपछि क्वारेन्टिन र स्वास्थ्य परीक्षणपछि बाहिर घुमिरहेको तस्बिर र भिडियो आएपछि म पनि ढुक्क भएँ।”
